سماح
سماح يا قلبي عشان ليالي
مجاش ع بالي ولا في خيالي
أوهب غرامي لحدّ خالي
لحدّ حتى ما همّو حالي
سماح يا قلبي سيبتك تعاني
من نار عذابي ونار هواني
سيبتك تحاول لعلّه يفهم
لعلّه مرّه يتوب ويرحم
ليه يا حبيبي عشقان ضياعي
عشقان أنيني عشقان خداعي
يا ريت يا قلبي عرفت اخبي
واكتم حنيني وداري حبي
سماح يا قلبي أسرني حبه
سحرني حسنه ظلمني قلبه
خليك يا قلبي صادق وصابر
لو حتى قلبه فضل يكابر
يا قلبي سامح أرجوك وصالح
عشان ملامك شديد وجارح
بلاش تلومني بلاش تعاتب
من النهارده هتوب وحاسب
لا تغضبي
لا تغضبي حبيبتي
إن جئتني كي نخرجا
لست الذي تبغينه
مدلالا مغنجا
فالنسر يأبى سجنه
لو بالعقيق سيجا
ما كنت يوما آلة
أو هيكلا مبرمجا
فقد أكون ساخرا
أو قد أكون محرجا
إن قلت شيئا نابيا
أو كان ردي هائجا
فالقلب قد ترينه
كالطفل غرا ساذجا
أو كالمحيط هادرا
وثائرا ومائجا
عندي خيال واسع
لا أرتضي ان يسرجا
لم أبن قصرا فاخرا
بل كنت دوما ناسجا
بضاعتي لا تشترى
إذ لم تجد مروجا
بالحبّ قلبي مفعم
والحبّ ليس رائجا
فهل رأيت فارسا
في عصرنا مدججا
بالحبّ والتسامح
فمثله لا يرتجى
في عصرنا اقدارنا
بالحب لن تعالجا
بالقهر أو بالدرهم
يبغي الطغاة المخرجا
جمالك
يا حبيبي الليله جمالك سحرني
وذوقك فتني وحسنك أسرني
يا حبيبي الليله غرامك رماني
ونورك بهرني بنظره ورماني
ده القمر من نورك بان عليه شحوبه
والسمر بحضورك سكت عن عيوبه
والزهور م الغيره في الجناين دابت
والنجوم م الحيره في الليالي غابت
يا حبيبي الليله جمالك حكايتي
حكايه هتسعد معاها حياتي
والليله عيونك هتبقى مرايتي
مرايه هتعكس زماني اللي آتي
يا حبيبي الليله جمالك ده آيه
بتجمع وتشمل جميع المزايا
والليله يا غالي معاك الأماني
هتصبح حقيقه تنور زماني
خايف
يا عمري حبك أمل حياتي
وسر وجودي وكنه ذاتي
يا عمري حسنك مدى الليالي
ملك مشاعري وملك خيالي
بسّ الحقيقه معرفش إمتى
هشوف جمالك يا روحي إنت
معرفش حتى هتكون حبيبي
أو حتى حبك هيكون نصيبي
كل اللي عارفه يا روحي إنك
جميل بحبك بديع بحسنك
حتى اللي شايفه في عيون فؤادي
بقوللي إنّك غير اعتيادي
فينك يا حبي فينك يا عمري
فينك يا شمسي فينك يا بدري
يا عمري خايف ألاقي يأسي
سيطر ع قلبي وسيطر ع نفسي
يا عمري حبك عزيز وغالي
وفي قلبي دايما وفي عقل بالي
بسّ انت فكّر وشوف طريقه
عشان غرامنا يصبح حقيقه
عصفور وطاير
قبل اللقا عشت في عذاب
والحبّ كان وهم وسراب
بسّ الهوى خلّى الفؤاد
بعد النوى بعد السهاد
اللازمه
عصفور وطاير في السما
ويّا النسايم والهوا
عصفور وهايم إنّما
ويّا الأماني والهوى
قبلك فؤادي كان حزين
م السهد والشوق والأنين
بس الهيام خلّى الفؤاد
لما العناد أصبح وداد
حسنك ندر والكل قال
حبّك قدر صعب المنال
بسّ النصيب خلّى الفؤاد
لمّا الحبيب حنّ بمعاد
والله الحياه حلوه في حماك
حلوه بهواك حلوه بلقاك
حتى الحنان خلّى الفؤاد
لمّا الزمان جاد بالمراد
متتأثرش
بلاش يا روحي تتألم
طبع العواذل تتكلم
بلاش للحظه تتندم
عشان مناهم تستسلم
خليك رزين هادي وراسي
أريح لراسك وراسي
خليك سعيد راضي وناسي
مهما الكلام ده كان قاسي
معقول هتقدر تنساني
وتفوتني وحدي لأحزاني
معقول هتقدر تسلاني
وتسيبني تاني لأشجاني
يا نور عيوني انسى الحاسدين
وانسى الملامه واللايمين
معقول نصدق قول حاقدين
ونعيد كلام ناس غير صادقين
يا روحي مين ميعرفش
ازاي يحب مينصفش
ومين كمان ميعطفش
يظلم ويقسى وميخفش
يا روحي سيبهم معذورين
عشان أكيد دول محرومين
يمكن كمان دول مظلومين
أو حتى يمكن مغدورين
إ زّاي
في جنينه جميله والقعده ظريفه
لا روايه طويله أو حتى خفيفه
نستني جمالك وهيامك بيه
نستني وصالك وغرامك ليه
ازّاي بسّ أنسى حبك يا حياتي
ازّاي لمّا أمسى أجمل ذكرياتي
ده نا كل ماشغل روحي بحاجه ثانيه
خيالك بيشعل قلبي في كل ناحيه
معقول صار حقيقه فراقنا وخصامنا
معقول فيش طريقه لعودة غرامنا
يا روحي بكبرك أيام عمري تاهت
وبصدك وهجرك أحلام قلبي ضاعت
محتار يا زماني بقلبه وضميره
خان حبّي وحناني ونا قلبي أسيره
محروم والله قلبي من فرح التلاقي
مظلوم بسّ قلبي على العهد باقي
حيرتني
أيام هواك حلو وجميل
زي النسيم صافي وعليل
وايام جفاك صعب وطويل
حتى الكلام بينا قليل
والله بهواك حيّرتني
حتى بلقاك غلّبتني
هواك ده إيه قوللي بقه
جنّه ونعيم ولا شقا
قلبي الوفي دايما معاك
مغرم بحسنك وبهاك
والروح كمان والله فداك
لو حتى كان حبّك هلاك
يا نور عيوني ليه كده
هوّ الغرام بالشكل ده
حبّ وحنان من غير حدود
بعده بزمان هجر وصدود
والله الغرام عندك عجيب
ده انت العذول وانت الحبيب
حتى الملام زاد بالدلال
والوصل أصبح شيء محال
ازاي هعيش عنك بعيد
والقلب من غيرك شريد
ده انت الحبيب ليّه الوحيد
وانت النصيب بسّ العنيد
ضيعت ليه
مش قادر اصدق يا ملاك
أصبح هواك صعب المنال
مش قادر اصدق صار جفاك
فعلا حقيقه ومش خيال
ضيعت ليه أجمل غرام
واجمل هيام واجمل وصال
صدقت ليه بس الكلام
حتى السلام أصبح محال
سنين ونا قلبي وفي
مهما انظلم مهما انكسر
سنين ونا بس مكتفي
بكلمه عنك أو خبر
قلبي معاك روحي معاك
وفي كل لحظه يا قمر
رغم الفراق عمري فداك
مهما الكلام زاد وانتشر
والله الغرام أحلى قدر
واحلى زمان واحلى نصيب
لو ما الحبيب بيّه غدر
لو ما النصيب راح للغريب
جيت لك
جيت لك أنا يا حبيبي
جيت لك بروحي وقلبي
جيت لك بناري ولهيبي
جيت لك بشوقي وحبي
جيت لك عشان تراعيني
جيت لك عشان تواسيني
جيت لك وتاريك يا عيني
ناسي الغرام وناسيني
جيت لك بذاتي ونفسي
بعد الليالي الطويله
عشان بعادك ويأسي
خلّوا الحياه مستحيله
جيت لك وفاكر حياتي
هتعود بوصلك جميله
جيت لك وفاكر آهاتي
هتكون بقربك قليله
جيت لك وشايل عشانك
الفين حكايه وحكايه
جيت لك ونفسي بحنانك
تمسح دموعي وشقايا
قبلك
ما كانش قبلك حبيبي
حبيب في قلبي وخيالي
ما كانش أصلا داري بي
سوى القمر في الأعالي
إنت الوحيد اللي حبه
سحر عيوني بحلاوته
وانت الوحيد اللي قلبه
أسر ودادي بغلاوته
قبلك سهرت الليالي
أبكي واشكي هواني
حتى بجمالك يا غالي
نورت قلبي وزماني
برد الشتا في البعد عنك
سهر عيوني وجرحني
بسّ الدفا بالقرب منك
نعس جفوني ولفحني
يا نور عيوني بحبك
من كل قلبي وبقول لك
يسلم لي حبك وقلبك
يسلم لي ضيك وظلك
لبيك
وانت بعيد عني اتذكر
قلبي معاك يا حبيبي
وانت وحيد اوعى تفكر
هنسى هواك يا حبيبي
اللازمه
لو بس تقوللي مشتاق لك
من قبل متغمض عينيك
هتشوفني واقف بنده لك
بنده وقول لبيك شبيك
لو كنت مظلوم من غير ذنب
وكنت عايز تتكلم
أو عشت محروم من غير حب
وكنت عاجز تتألم
لو كنت محتاج لهمسه
م القلب تسعد ودانك
أو كنت محتاج للمسه
م الحب تمسح هوانك
لو جيت تدور ع الأحباب
اللي انت ضحيت عشانهم
أو جيت تدور ع الأصحاب
من غير متعرف مكانهم
متسألش
متسألش يا حبيبي
عن عذابي طول بعادك
متسألش عن نحيبي
طول غيابك عن بلادك
وانت جمبي يا منايا
بسّ إسأل عن شعوري
بسّ إسأل عن هنايا
عن رضايا وعن سروري
ما تسألش عن أحزاني
يا حبيبي وعن أشجاني
ما تسألش عن أحلامي
كل ليله وعن أوهامي
ما تسألش عن ظنوني
عن جنوني وعن سكوني
ما تسألش عن جهادي
مع فؤادي ومع سهادي
ما تسألش عن جمودي
عن صمودي في وجودي
ما تسألش عن آهاتي
وعن مماتي في حياتي
لو نويت
يا حبيبي لو نويت في يوم تسافر
أو نويت لبلاد غريبه في يوم تهاجر
اللازمه
خود معاك شمس النهار خود معاك البدر
خود معاك ضي النجوم والسما والبحر
خود معاك كل حاجه بسّ سيب لي الصبر
يا حبيبي لو شقيت في احضان بلادك
نار بلادك لسّه أرحم من بعادك
يا حبيبي الأرض محتاجه لجهودك
ليه تسيبها وهيّه محتاجه لصمودك
بس لو قلبك خلاص قرّر يسافر
والكلام معدش ينفع راح تهاجر
يا حبيبي مهما روحنا ومهما جينا
دم بلادنا برضه رايح يجري فينا
هيّه روحنا وان بكت فيها عينينا
مستحيل يرخص ترابها يوم علينا
بسّ لو قلبك خلاص قرر يسافر
والكلام معدش ينفع راح تهاجر
اللازمه
نفسي أوصف
نفسي أوصف لك هوايا
يا حبيبي وانت جمبي
نفسي أوصف لك هنايا
في نعيم حبك وحبي
ده انت صحّيت بعد غفوه
نبض قلبي وروح حياتي
وانت خلّيت فيّه نشوه
بعد ما طوّل سباتي
يا حبيبي مهما افكر
مستحيل أوصف وصالك
مستحيل حتى أعبر
أو أصور نور جمالك
نفسي اقول لك يا حبيبي
كل كلام الحب بهمسه
نفسي أرسم لك نصيبي
م السعاده لو بلمسه
نفسي أرقص نفسي اغني
نفسي أملا الكون أغاني
نفسي كل الناس تهنّي
قلبي وسنيني وزماني
يا كاتم
يا حبيبي ليه بتكتم
نار هواك عنّي وحبك
بالسكوت مش بس بتظلم
قلبي وحده برضه قلبك
يا حبيب قلبي يا غالي
عمرنا عمّال بيجري
وانت قلبك غير مبالي
فكره لسّه العمر بدري
يا حبيبي بالتردد
مش هتقدر يوم تقرر
مش هتقدر بالتشدد
حتى تختار أو تفكّر
يا حبيب قلبي ظنونك
في الخريف مش رايحه تنفع
والشكوك اللي في عيونك
في الليالي مش هتشفع
يا حبيبي سيب غرورك
سيب قساوتك ودلالك
قبل ميطفي فتورك
نار حنيني لوصالك
الناي
يا حبيب قلبي ومنايا
طول مقلبك مش معايا
هشكي همي ونار هوايا
في الليالي لناي صبايا
يا حبيبي فين زمانك
فين غرامك فين حنانك
ياما قلبي شال عشانك
حتى يحفظ لك مكانك
يا حبيبي بطول بعادك
راح يضيع مني ودادك
إيه شعورك أيه مرادك
من غرورك وعنادك
يا حبيبي قلبي خايف
من غيابك وانت عارف
بسّ برضه الربّ شايف
قد إيه الإحساس ده عاصف
يا حبيبي ليه بتقسى
ده الغرام جوايا لسّه
يا حبيبي ليه بتنسى
دي في وداني كل همسه
شوف الغرام
شوف الغرام في الدنيا دي
شوف يا حبيبي واستغرب
أصبح طبيعي وشيء عادي
نحب ونكدب ونهرب
مافضلش في الدنيا صادق
غير بسّ حبك وحبي
ما فضلش مغرم وعاشق
غير بسّ قلبك وقلبي
فين الغرام العارفينه
من الغرام الشايفينه
غرام جميل وبثينه
وابن الملوح وليلى
فين الغرام وغلاوته
فين الهيام وحلاوته
فين المشاعر والأحساس
فين المحبه والأخلاص
حبّ النهارده تسالي
مش الغرام المثالي
ده صار غرام ولاد وعيال
وصار كلام بالخوف يتقال
ده الحب عالم وحنا فيه
ملناش حياه غير بسّ بيه
و الحبّ عالم بصموده
مرهون وجودنا ووجوده
عينونك
يا حبيبي في الأغاني
للعيون أوصاف كتيره
بسّ يا خساره المعاني
جات على نفس الوتيره
بسّ برضه كل فكره
في القصايد جات جميله
انّما دي بألف مره
مش كفايه وفيك قليله
دي الكواكب في الليالي
جات بنورها من جبينك
والمراكب جات يا غالي
بالكنوز دي بلون عيونك
يا حبيبي مين هيقدر
يوصفك انت وجمالك
مين هيقدر مهما فكر
ينصفك انت وخصالك
يا حبيبي مهما قالوا
لسّه حسنك فوق خيالهم
ده انت لزمك قول بحاله
والكلام ده مش مجالهم
يا قلبي بيع
بعد مخانك حبيبك
اللي فكرك كان نصيبك
بعد مضيّع شبابك
لمّا غاب عنك وسابك
يا فؤادي امسح دموعك
وامسح الذلّ بخضوعك
ده الغرام قبل البدايه
بالملام وصل النهايه
يا فؤادي انسى اللي خانك
وانسى مين جاب لك هوانك
حتى بيع مين قلبه باعك
واللي كان عاشق خداعك
يا فؤادي اعمل حسابك
مش هينفع فيه عتابك
ده اللي خانك خان زمانك
خان غرامك خان حنانك
يا فؤادي لو خيالي
كان هيامك بيه وغالي
لسّه جواك في كرامه
لسه عندك في شهامه
يا فؤادي ارجع لنفسك
وانسى حزنك وانسى يأسك
بص لبكره وبص لبعده
وانسى وعده وانسى عهده
عهد الغرام
لمّا الغرام بينا مضى
عهد الهوان بينا ابتدى
حتى الهيام راح وانقضى
لمّا الحنان ضاع والأمان
ليه يا زمان كل الحنان
كل الأمان عدّى وراح
ليه يا زمان الودّ هان
والحبّ صار قسوه وجراح
هوّ اللي كان بينا غرام
ولا اللي كان كدب وخداع
هوّ اللي كان بينا هيام
ولا اللي كان غدر وضياع
من غير كرامه لأ مليش
بالحب والشوق والهوى
من غير شهامه لأ مفيش
في القلب غير صد ونوى
والله الغرام حلو وجميل
من غير مكابره أو جوى
حتى الوصال لو كان قليل
ده لسّه أفضل م النوى
حرام
والله حرام والناس في عيد
تفضل بعيد عني وعنيد
والله حرام والعام جديد
قلبي الوحيد في الكون شريد
والله حرام تنسى الغرام
والناس في فرحه وانسجام
والله حرام كل الهيام
أصبح ألام بينا وخصام
ده العيد محبه وانشراح
والناس بنشوه وارتياح
بسّ انت خلّيت الجراح
حظي ونصيبي للصباح
اشمعنى بس قلبي أنا
في العيد كمان حظه الضنا
واشمعنى بس وحدي هنا
محروم من الحب والهنا
إرجع حبيب قلبي وعود
إرجع وصون كل الوعود
إرجع بقه رغم الحدود
رغم الملامه والصدود
إرجع حبيبي ده الغنا
والرقص واصل للسما
ده انت السعاده والهنا
وانت الأماني والمنى
إرجع وشوف كل الحنان
واسمع تهاني الناس كمان
إرجع ونسّيني الهوان
اللي انكويت بو من زمان
نفسي أحب
نفسي أحب يا ناس نفسي
نفسي أحب وانسى نفسي
نفسي أحب وانسى نحسي
وانسى عذاب أمسي ويأسي
نفسي أحب بسّ الاقيك
يا اللي ليالي بحلم بيك
نفسي أشوفك وراعيك
نفسي أضمك ولاغيك
نفسي أحب وقول للكون
حبي وهب لك طعم ولون
نفسي أحب وعيش مفتون
بأحلى بدر وأحلى عيون
نفسي أحب لأبعد حد
لسنين طويله ملهاش عد
نفسي أحب حب ولا حد
من قبل مني عرفو بجد
نفسي أحب واشكر ربي
نفسي أحب من كل قلبي
نفسي أعيش وياك حبي
وانسى معاك يأسي وغلبي
مش هسامحك
مش هسامحك يا حبيبي
يا اللي قلبك خان هوايا
مش هصالحك لو نصيبي
كان في بعدك طول شقايا
مش هسامحك مهما تحكي
مهما تشكي ومهما تبكي
مش هصالحك مهما تنفي
ومهما توعد بكره توفي
مش هسامحك ياللي قلبك
باع غرامي وباع حناني
مش هصالحك ياللي حبك
ضاع وضيّع لي زماني
مش هسامحك ياللي غدرك
خلّى هجرك طال وصدك
مش هصالحك ياللي كبرك
خلّى عندك زاد وبعدك
مش هسامحك لو دموعي
جرّحت خدّي وضلوعي
مش هصالحك رغم حبي
رغم ودي وعشق قلبي
زمن سعيد
عشان حبيبي صار أكيد
بينا الغرام واصبح شديد
عشان حقيقي بات سعيد
قلبي اللي كان قبلك شريد
هرقص وغني للزمان
اللي بهواك أصبح أمان
هرقص وغني للحنان
اللي تملا بدفؤوالمكان
ليل الجراح يا قلبي راح
لمّا الصباح بنوره لاح
حتى النسيم بالعطر فاح
لمّا الحبيب بالحبّ باح
دلوقتي بس بعد الضنا
حضن الهوى هيضمنا
دلوقتي بس بعد اللقا
كل المنى هتكون لنا
يا خساره بس على السنين
اللي انقضت شكوى وأنين
وخساره ع القلب الحزين
اللي انكوى بنار الحنين
إشاعات
ياما سمعت عنك كلام
ياما وصل منك ملام
ياما الإشاعه عذّبت
قلبي وياما تعّبت
قال إيه غرامك يا جميل
صعب المنال أو مستحيل
عشان غرور قلبك رهيب
عشان فتور حبك عجيب
بسّ الغرام بينا كبير
قدّ الوجود واكبر كتير
رغم الأشاعه كان شديد
رغم الملامه كان عنيد
معرفش ليه عند البشر
أصبح مباح نقل الخبر
ده من الصباح حتى السهر
بسمع كلام يكوي الحجر
ليه بس كده يا ناس حرام
خلاص بقه لحظة سلام
هيفيد بأيه بينا الخصام
ولا الملام طبع الأنام
يا نور عيوني ربنا
هّو اللي بس عالم بنا
هوّ اللي أدرى بقلبنا
هوّ اللي هيصون حبنا
No comments:
Post a Comment